Maider IANTZI GOIENETXE
Bere kabuz bateria jotzen hasi zenetik ibilbide oparoa egiten ari da
Gorka Gaztanbide iruindarra. Orain arte, ordea, ez du bere abestiekin
diskorik osatu. «Gustatzen zait konposatzea», aitortu zion GARAri atzo,
“Gorka Gaztanbide & Txikizio Kuadrilla” (Gaztelupeko Hotsak) lanaren
aurkezpenean. «Meloia ireki dugu, eta horretan segituko dugu».
1997an Iruñeko Desoreka taldearekin disko bat atera zuen.
Urteekin jazza maitatzen hasi zen, jazz zikloa egin zuen
kontserbatorioan eta mundu horretan ibili da luze. Broken Brothers Brass
Band da parte hartu duen proiekturik ezagunena. Orain, grabaketa eta
kontzertu guztien tarteetan konposatzen joan den abestiak plazaratu
ditu.
Gustuko dituen «musikari finak» aukeratu ditu horretarako. David
Burguiren gitarrak, Kike Arzaren baxuak, Ramon Garciaren pianoak eta
Gaztanbideren ahotsak eta bateriak osatu dute oinarrizko laukotea.
Abesti batzuetan Haizea Gaztanbide ilobak egin ditu koruak eta Alberto
Arteta eta Raul Arizaleta izan ditu kide, lehena saxo tenorrean eta
bigarrena gitarran.
Lan freskoa, entseatu gabe
«Ez genuen entsegurik egin, freskotasuna bilatu nuelako eta
konfiantza neukalako kideengan. Banekien nik aurkeztutako kantuak
hobetuko zituztela beren ukituekin. Pistaka grabatu beharrean, denek
elkarrekin jotzeko nahia ere banuen», azaldu zuen.
Urtarrilaren 2an eta 3an grabatu zuten diskoa, Javier de Mabel lagunaren Sartagudako estudioa inauguratuz.
Txikizio Kuadrillak omenaldia egiten dio 70eko hamarkadako New
Yorkeko ezkutuko talde bati: The Breaking Crew. «Denek elkarrekin joz
grabatzen zuten eta ni gauza bera egiten saiatu naiz».
Diskoan euskarazko pop musika aditzen da, musika urbanoaren
kutsuekin, jazz pixka batekin eta flamenko estiloko poemekin. Lehen
kantua, singlea, Amaia Lasa izebaren olerki musikatu bat da.
Bigarrenean, frantsesez kantatzen du nola garai batean hagitz bestazalea
zen baina etapa horri bukaera eman zion.
“Hermano”, duela urte batzuk minbiziak eraman zuen anaiari
konposatutako abestia da. Amari oparitu dio abesti bat, Gustavo Adolfo
Becquerren olerki bat erabiliz, eta neska lagunari bertze bat. Julio
Anguitaren diskurtso bat ere agertzen da. Aitortu duenez, diskoan
«eguneroko batean» bezala «biluzi» da.
Pandemia egoera honetan itxaroten ari da ea txertaketek aurrera
egiten duten, lana abuztuan edo irailean aurkezteko. Bitartean, nahi
duenarentzat entzungai dago Spotifyn, Youtuben edo Apple Music-en.
«Kontzertuak egiteko asmoa daukat, printzipioz diskoa grabatu dugun
formatuan, boskote-seikotean», jakinarazi zuen orain Donostian bizi den
iruindarrak.
(Argazkia Jon Urbe)
