basauri. Gaur, 19:30ean, Arizko dorretxean.zornotza. Bihar, 21:00etan, Zelaieta aretoan.leioa. Ostiralean, 22:00etan, Ambigu kafetegian.

erredakzioa donostia

Bizkaiko Blues-Jazz zirkuitua amaitzeko, Antonio Serrano harmonika jotzaileak eta Federico Lechner piano jotzaileak hiru kontzertu eskainiko dituzte aste honetan, Basaurin, Zornotzan eta Leioan.

Jazz, blues eta musika tradizionalarekin lotura duten doinu berriak entzuteko parada izango da kontzertu horietan. Tango eta jazz doinuekin hasiko dituzte emanaldiak. Horrez gain, kontzertuan, new age estiloa ere joko du bikoteak. Ondoren, bakoitzaren diskoetako abestiak erakutsiko dituzte jendaurrean. Bestalde, Sesion continua aurkeztuko dute, bi musikariek batera egindako lana.

Bi artistek urte asko daramatzate musikaren munduan. Serrano (Madril, 1974) aitarekin hasi zen musika ikasketak egiten, eta gero, bere kasa jarraitu zuen. Louis Armstrong eta Toots Thielemans musikariak entzun ostean, jazz doinuak lantzea erabaki zuen.

Artista ugarirekin egin du lan Serranok. Paco de Lucia, Larry Adler, Luis Salinas eta Javier Colina musikariekin, besteak beste. Guztira, lau disko kaleratu ditu bakarlari moduan: Más que Dos, En el Central, Corazón al Sur eta Sesión Continua. Lehenengoa Mario Torres soinu jotzailearekin grabatu zuen. Bigarrena, berriz, Josua Edelman hirukotearekin batera egindako diskoa da.

Harmonika jotzaile argentinarra

Lechner (Buenos Aires, 1974) umea zela hasi zen musika jotzen. Hiru urte besterik ez zituela, musika ikasten hasi zen. Jazz estiloan egindako lehen pausoetan, pianoa jotzen ikasi zuen Horacio Icastorekin. Harmonika irakasle, berriz, Rafael Reina izan zuen. Hark erakutsi zizkion harmonikaren trikimailuak.

Serranok bezala, artista ugarirekin jo du Lechnerrek. Jazz musikan, Sonny Fortune, Jerry Gonzalez, Bob Sands eta Ximo Tebar mailako musikariak izan ditu ondoan. Bestalde, bost disko argitaratu ditu urte horietan guztietan: A primera vista, Jazz on Sale, Klazyc, Esbaesbabaesbaba... eta Sesion Continua. Diskoak grabatzeaz gain, irakaslea da. Inprobisazio eskolak ematen ditu Espainian, Amerikako Estatu Batuetan eta Belgikan.