Zerotik hasi (Kirmen Uribe / Imanol Ubeda)

Zerua goian
Eta lurra behean zaudela,
Etxea suntsituta,

Zenbait oroitzapen,
Lagun bakarra,
Asmo bakarra,
Nahikoa dira.

Eta atzera zerotik hasi,
Bide berri bati ekin.

Hotel Bel-Air (Mikel Ibarguren / Ima Ubeda)

Mahai gainean daude oraino
Elkarrekin hustu genituen botilak,
Basoerdiak, berba xaloak,
Ausentziari eman nahi ez genizkion
Musuketak, ezpain umelak eta
Desira agerikoak.
Ezkerraldera okerturik segitzen du
Gernika koadroak,
Eta Maná-ren azken cda baino ez da aditzen
Leihoak zabalik dituen egun urdin honetan.
Mahai azpian daude, bestalde,
Gure sandaliak,
Oinetan ekarri hondar garauak eta
Zure azal erantzia.

Konplotean dihardut (Jose Luis Otamendi / Ima Ubeda)

Hodeien atzetik
Euria eragingo diet gau epeletan
Bila zaitzaten
Nire koadernoak beteko dituzu
Hutsunez
Noizbait ahazten banauzu
Udaberriaren ertzetan

Ez dut atertu
Sutan labeak irakiten galdeak
Maitatzeko konplotean dihardut

Plaza Berrian (Ima Ubeda)

Geroaren beldur zinela
Esan zenidan belarrira
Denbora izoztuko nuela
Erantzun nizun ezpainei begira

Plaza Berriko eserlekuetan
Ederragoa dirudi gauak

Oker daiteke bidea
Nonahi badira bihurguneak
Goza dezagun gau atal hau
Elkarren ondoan gauden artean

Zuretzat dira
Nire kantu traketsak
Zuretzat dira
Zu gabe ez ditut behar eta

Kantari bizi denak
Urruntzen ditu gaitz guztiak
Oraina kanta dezagun
Urrun ditzagun gaitz guztiak

Plaza Berrian gaua egin arren
Eder jarraituko du euriak

Zuretzat dira
Nire kantu traketsak
Zuretzat dira
Zu gabe ez ditut behar eta

Tori daukadana
Eskuak, akordeak
Tori daukadana
Zu gabe ez ditut behar eta

Utzidazu (Ima Ubeda)

Dorre asko eraitsi ziren
New Yorkekoak jauzi baino lehen
Herri asko amildu dira
Errepide mapa baten bila

Mila eta bat gau zor dizkigute
Bakar batekin ni konforme

Utzidazu
Zure ametsetan behingoz lur hartzen
Zeru bat
Desorduetan bertan landatzen

Manhattan ez da berdin izanen
Ez Bagdad ezta gu ere
Etenik gabeko su ilunean
Bi bala galdu izan gaitezke

Amets batentzat lurra bagara
Errauts artean altxako gara

Utzidazu
Babesa nahi dut zure begietan
Baimen gabe
Iraultza egin zure begietan

Amets batentzat lurra bagara
Errauts artean altxako gara

Utzidazu
Zure ametsetan behingoz lur hartzen
Zeru bat
Desorduetan bertan landatzen

Geratzen zaigun denbora (Ima Ubeda)

Orain desorekan ere
Oreka bilatzen asmatu dugunez

Orain zalantzekin dantzan
Ezinekin lotan ikasi dugunez

Maindire artean gordeko dugu
Geratzen zaigun denbora

Bion artean
Lehertuko dugu
Bakardadea

Orain eguzkipean
Gure zauriak ixten direnez

Orain egun euritsuetan
Calellako hondartza amesten dugunez

Maindire artean gordeko dugu
Geratzen zaigun denbora

Bion artean
Lehertuko dugu
Bakardadea

Bion artean
Uxatuko dugu
Atsekabea

Geratzen zaigun denboran

Bion artean
lehertuko dugu
Bakardadea

Zazpi (Ima Ubeda)

Zazpi amets
Bi esku abesti bat
Zazpi ate
Bi begi desio bat

Zazpi bide
Zazpi lagun maitale bat
Zazpi baietz
Zazpi ezetz zazpiak bat

Zazpi galderak, zazpi erantzunak
Zazpi zalantzen basamortuan
Zazpi egiak, zazpi gezurrak
Zazpi bizitzak bakar batean

Zazpi bidaia
Zazpi itsaso aingura bat
Zazpi ideia
Zazpi asmo geroa zain

Zazpi zalantzen basamortuan
Zazpi bizitzak bakar batean

Zazpi amets
Bi esku abesti bat
Zazpi ate
Bi begi desio bat
Zazpi bide
Zazpi lagun maitale bat
Zazpi baietz
Zazpi ezetz zazpiak bat

Zuhaitzen denbora (Lirmen Uribe / Ima Ubeda)

Zugan da zuhaitzen denbora
Elkar maitatu ondoren.

Ohean lo, betazalek
Soilik estaltzen zaituzte.

Ez jarraitu beldurrari,
Ez esan beti ez inoiz ez,
Utzi libre denborari
Bidea egiten.

Zugan da zuhaitzen denbora
Elkar maitatu ondoren.

Plazer-urak biltzen zaitu
Malkoak begia legez.

Ez jarraitu beldurrari,
Ez esan beti ez inoiz ez,
Utzi libre denborari
Bidea egiten.

Zugan da zuhaitzen denbora
Elkar maitatu ondoren.

Nonbait (Ima Ubeda)

Nonbait utziko nuen
Begirada eder hura
Nonbait utziko nuen
Baina ez naiz akordatzen

Aspaldi joan zinen
Ia oharkabean
Aspaldi joan zinen
Isilik hitzik gabe

Geroztik
Zerk urrundu gintuen
Galdezka ibili nintzen

Zerk urrundu gintuen
Zer axola du orain
Zerk urrundu gintuen
Jada ez dut jakin nahi

Geroztik
erantzun gehienak
Sobran, sobran baitaude

Ze lehen
Bide bakarra ginen
Eta orain
Biok bi bide gara

Nonbait utziko nuen
Begirada eder hura
Nonbait utziko nuen
Baina ez naiz akordatzen

Baforea (Ima Ubeda)

Mapetan ez diren portuetan
Bila ibili naiz aspaldi
Galdu genuen itsaso hura
Non ote den jakin nahian

Galdetu diet marinelei
Untziolako langileei
Baina inork ez du haren berririk

Lokatzetan ainguratu da
Gure baforea

Faro itzalien zerupean
Murgildu ginen aspaldian
Seinalerik ez da gure bidean
Itsasorik ez bide ertzean

Galdetu diet itsasgizonei
Mendebaldeko naufragoei
Baina inork ez du haren berririk

Lokatzetan ainguratu da
Gure baforea
Behelainotan geldirik goaz
Abante bizian

Iritsi dira notiziak (Ima Ubeda)

Iritsi dira notiziak
Iritsi dira eskutitzak
Baina ez zureak.

Igaro ziren hegazkinak,
Erre zituzten zubi denak,
Isildu bazterrak.

Galdetu diet hegaberei,
Galdetu pago biluziei,
Ez dakite ezer.