Hemen zaude: Hasiera Denda Zaharregia txikiegia agian Komentarioa

Komentarioa


Zaharregia, txikiegia agian poesia, kantua eta marrazkiak elkartzen dituen disko-liburua Kirmen Uribe, Mikel Urdangarin, Bingen Mendizabal, Rafa Rueda eta Mikel Valverde.

“Zaharregia, txikiegia agian” izeneko egitasmoak eraman zituen Kirmen Uribe idazlea eta Mikel Urdangarin musikaria New York hirira 2003ko udaberrian. Sei saio eman zituzten bertan, New Yorkeko beste horrenbeste areto esanguratsuetan, poesia eta musika uztartuz. Beste bi musikari izan zituzten bidelagun, Bingen Mendizabal —hainbat filmetako musikaren sortzailea— biolina jotzen eta Rafa Rueda —rock talde berritzaileetako kidea— gitarra elektrikoarekin.

Arrakasta osoz burutu zuten hango biratxoa —horren adierazgarri The New Yorker eta Open City aldizkari ezagunetan argitaratu izana— eta orain Euskal Herrian eskaintzera datoz, zuzeneko emanaldi eta gaur aurkezten den liburu-diska formatoan.

"Zaharregia, txikiegia agian" izena berak eginiko euskarari buruzko poema batetik hartu zuen Kirmen Uribek, zabaldu nahi duen mezua laburbiltzen baitu: "Euskara, Euskal Herria, agian, zaharregia, txikiegia dela gaur egungo garaietarako, baina azken finean, euskaldunok munduari begiratzeko modu jakin bat eskeintzen dugu, bizitzeko eta sentitzeko modu bat"

Azken aldiko literatura, musika eta irudiak elkartuz, gure garaiko kezkak modu garaikide eta garbian adierazten dira. Era berean, kultura arlo ezberdinetan aritzen diren bost euskal sortzaile batzen ditu —poesia, kantagintza, filmak, irudigintza eta rock alternatiboa—, denak ere bakoitza berean bide berriak urratzen.

Liburu-disko berri honek, musika, irudiak eta hitzen arteko oreka du ezaugarri. 140 orrialdeko liburuan Kirmenek lehenik New Yorkerako pentsatutakoak eta gero grabaketa egiteko idatzitako olerkiak erabili izan ditu. Hiru hizkuntzatan -euskara, gaztelania eta ingelera- agertzen dira testoak, edizio zaindu batean. Bertarako, Mikel Valverde marrazkilariak propio egindako lana dago, olerki bakoitzerako ilustrazio bat, 60 irudi berri guztira. Liburu osoaren diseinua ere Valverdek egindakoa da.

Mikel Urdangarinek proiektu honetarako eginiko kantuez gain, Haitzetan eta Atharratz jauregianen bertsioak ere grabatu ditu. Bingen Mendizabalek zazpi soketako biolina eta Rafa Ruedak gitarra elektrikoa maneiatzen dute. Grabazioan Kirmen Uriberen ahotsa ere entzun daiteke, kantua ematen duen errezitatua