A soidade das cidades. A noite. A lembranza da infancia. O tempo pasado. O lugar de orixe como patria emocional. Son alicerces de Brétemas da memoria, o quinto disco de Víctor Aneiros, que nunhas semanas chegará ás tendas. Un traballo que afonda na alma de blues do poeta Ramiro Fonte (1957-2008).

No teu anterior disco, "Heroe Secreto", musicaches a Rosalía de Castro, Luís Pimentel e Amado Carballo. Tamén estaba xa Ramiro Fonte, co tema "Na barra"...

Si. Descubrín a Ramiro tarde, e penso que é un dos grandes escritores contemporáneos en galego. É un poeta moi urbano, e para un músico urbano que fai rock-blues coma min... Lin moitos libros del, e penso que era un moi bo intérprete da vida nas cidades: exploraba a soidade as cidades coma ninguén. Ademais eu son de Ferrol, e Ramiro viviu en Ferrol... A miña relación con el foi só telefónica: pedinlle a letra para facer Na barra, e despois el xa enfermou moito...

O título do disco é un verso do tema "Sirenas de policía"...

Si. Escollino porque reflicte o que é o disco. Nun principio non ía ser un disco dedicado a Ramiro, pero cada vez ía engadindo máis poemas del... A letra dun dos temas, Axúdame, é doutro escritor, Xosé Carlos Caneiro, que escribiu unha historia de amor para o meu disco. Caneiro, coma Ramiro, fala da soidade na cidade... O disco inclúe ademais dous temas instrumentais: Canido blues, que ten que ver coa volta á infancia -Canido é o meu barrio-, e Bule Bule, que podería ser un reflexo dos anos tolos de Ramiro...

Este disco soa máis pausado que o anterior... Melancolía é unha palabra que se repite moito...

É que un vai maior... (ri). Non é un disco triste, de todos os xeitos. Pero no anterior o meu xeito de cantar era máis agresivo. Neste tento que se entenda ben o que digo, é máis lírico e coral. Non é tanta guitarra... E ás veces nin canto, senón que falo... Segue na liña do anterior, pero é distinto...

Ten varias colaboracións...

Os músicos son os de sempre, da banda: Manuel Gutiérrez (teclados) de Sumrrá, Marcos S. Yáñez (batería) e Víctor Gacio (baixo). Ademais colaboran neste disco Javier Vargas, que fai un só de guitarra en Axúdame, Mauri Sanchís, que se move no ámbito do jazz-funki e tocou con xente como Kepa Junkera, e Roberto Somoza, saxofonista, que fixo os arranxos de metais. Tamén colaboran José Somoza (trompeta), Fernando Froján (trombón) e Javier Díaz, que toca o acordeón no tema Máis alá, que fala sobre a fronteira con Portugal...