Bosgarren haria, liburuxka formatuko bitxi txikiak

Pasa den urtean irekitako bideari jarraikiz, Bosgarren haria izena daraman sailaren ale berriak argitara eman ditu Hotsakek, Durangoko azokaren atarian. Ramones, The Clash, Itoiz, edo Public Enemy izan ziren lehen erreferentziak eta honako hauek, Bap!, Jotakie, eta Rory Gallagher, izan dira aukeratuak.

Joxi Ubedak idatzi du Bap! taldeari buruzkoa. Kazetaria eta musikaria da Ubeda eta gertutik ezagutu zuen Bap! taldearen sorrera eta amaiera. Hamaika pasadizo bizitakoa da andoaindar bandarekin eta gerturik suma daiteke hori liburuan. Jotakie taldea sortu zenean, jaio gabe zegoen oraindik Xabi Borda, Urolan pop liburuaren idazlea. Jotakie talde esanguratsua izan zen 80ko hamarkadaren hasieran eta, garapen izugarria izan zuen taldea izateaz gain, pop musikara hurbildu zuen bere musika proposamena.

Jon Gurrutxagak, aldiz, Rory Gallagher musikari ezagunaren ibilerak eta bizitza islatzen dizkigu Kemena eta leialtasuna izeneko liburuxkan. Rock munduan ikono bat izateaz gain, ehunka euskal musika bandak izan dute musikari estatubatuarraren eragina eta horietako bat da Jon Gurrutxaga (Arima Beltza, Uek). Amaitzeko, Txuma Murugarrenen idatziak jasotzen dituen Larrialditako irteera izeneko liburua ere argitaratu du Hotsakek. Bertan, musikari eta idazle horrek azken urteetan prentsan argitaratu dituen idatziak biltzen ditu.

Paper Hotsak 94 Posta Kutxatila, 20.590 Soraluze paper@hotsak.com, www.hotsak.com.