Hemen zaude: Hasiera Albisteak Mikel Gaztelurrutia: The New Jazz Voices Ensemble

Mikel Gaztelurrutia: The New Jazz Voices Ensemble

2010/03/22

Har eskukada bat jazz standar – Ellington edo George Gershwinen obrak–, “herri klasiko” guztiz ezagun birekin nahasi – esate baterako Roxanne (The Police) edo Don’t you worry about a thing (Stevie Wonder) gaiekin– eta gehitu  bossaSamba Do Novo Amor moldeko pieza bat eta Aita Donostiaren konposizio eder bat -Oinazez- nazioarteko lurrina guztiz sarkorra izan dadin. Emaitza: lurrin guztiz exotikoa, usain ezberdinak maite dituztenak ere zur eta lur utziko dituena. Eibarko Coliseo antzokian grabatutako jazz disko berezia Mikel Gaztelurrutia piano jotzailearen eskutik

Guztiz sendoa den hirukotearen gainean eraikia (Vincent Thomas-bateria-, Richie Ferrer –kontrabaxua- eta Mikel Gaztelurrutia bera nahikoak dira musika-ehun honi guztiari eusteko), The New Jazz Voices Ensemble taldearen errepertorioak harribitxi txiki batzuk gordetzen ditu.

Ahotsa da proiektu honen benetako leit-motiv-a, eta horrek berak egiten du berezi: hautatutako bertsio batzuek, lehen begiratuan bederen, oso ezagunak diruditen arren, guztiek azaltzen dute jatorrizko gaiei erakutsitako begirunetik eta maitasunetik egindako sormen lan hurbila, lan sakona eta xehetasunez betea. 

Adituak ez direnek abesti bilduma bikain bat topatuko dute oso testuinguru hurbil batean. Errepertorioa ezagutzen dutenek, berriz, arestian aipatutako klasikoekin gozatu ahal izango dute, hori bai, guztiz tratamendu berezi batekin.