Gaztelupeko Hotsak diskoetxearen eskutik, artista bizkaitarrak bosgarren diskoa aurkeztu berri du, Heldu artean izenburupean

D.N. - Iruñea

Mikel Urdangarin bertsolaritzatik etorritako konpositore eta kantaria dugu, azken urteotan lan izugarri oparoa egun duena. Bere disko guztien harrera onak Euskal Herri osoa zeharkatzera bultzatu izan du, eta hemendik kanpora ere emanaldi andana egin ditu: Kanariar Irletan, Madrilen, Eskozian...

Egunean zehar jasotako inpresioez baliatzen da Mikel bere istorioak osatzeko, eta gero dator kantua. Horrela sortzen dira kanta sugerenteak, intimistak batzuetan, herrian sustraitutakoak, wsperientzia pertsonaletan oinarritutako testu koloretsuak... Minimoa erabiliz erakusten du maximoa. 1994.urtearen bueltan hasi zen kantatzen. Bere lehen lan luzea, Haitzetan (1997), lan biluzia izan zen. Ahots hutsa ardatz zuela, gitarra akustiko eta txeloz jantzitako doinuak ageri ziren. Bigarren lan luzearekin lortu zuen sona handiagoa, Badira hiru aste (1998). Honetan, iraganari begiratu zion: iragandako garairen bati zegozkion paisaia eta pasarteak, orduko egiak eta asmakizunak, pozak, tristurak... Bidaiaren buruan disko berri baterako kanta dexente bilduak zituen, eta horrela, sortu zen Espilue (2000). Bertan, Eskozian Cantrip talde folkiarekin batera grabatutako bi kantu ere agertzen dira. Urte haratako Durangoko Azokan diskorik salduena suertatu eta Euskal Herriari buelta eman zion Mikelek, emanaldiak eskainiz.

Ezin geldi egon eta Bingen Mendizabalekin batera 2001ean egitasmo berri bati egin zion aurre, Kirmen Uriberen testuetan oinarritutako Bar Puerto ikuskizuna hain zuzen, laster bere laugarren diskoa bihurtuko zena (2001) Heldu artean, kantari bizkaitar honen bosgarren diskoa da. Bertan, folk akustikoaren bidetik jarraitzen du, nahiz eta oraingoan haren alderdirik urbanoena erakustea aukeratu duen. Kantu gehienak Mikelek berak konposatu ditu eta horien artean bada katalanez abestutako bat ere.