Joseba Tapia akordeoi diatonikoaren maila goreneko jotzaile eta konpositoren artean dugu. Egia esan trikitiaren munduaren baitatik sortzen den musikaria da, odolaren eta familiaren kontua. Baina musikari hau xukapaperaren antzekoa da, urteetan zehar bere garaiko eta bere garaietako musikak egin ditu bere, Euskal herrikoak eta mundu zabalean aurkitu dituenak.
Oso gazte zela hasi zen Leturia panderojolearekin.Tapia eta Leturia osatu zuten 1985ean Euskadiko txapelketa irabaziaz. Ondoren trikitrilari gazteen artean izango duen eragina zeharo agerikoa da.

Baina Tapiak aukeratu duen bidea independentzia pertsonalaren aldekoa da. Triki-poparen bidea baztertuz hainbat estilo eta molde ezberdinetan arituko da Tapia eta Leturia Band taldeak rock-antzeko moldeari akin zionetik, Hiru Truku taldearekin Ruper eta Bixenterekin, tradiziozko balada zaharrak moldatuz baladagile europarrak eredutzat harturik, Leturiarekin batera dantza egiteko doinu zaharrak berreskuratzeko proiektuetan egin du lan eta azken honetan, Bizkaiko kopla zaharrak gaurkotzeko urratsak egin ditu.

Baina Koldo Izagirrerekin batera bideratutako proiektua izan da bere "tour de force" delakoa, izan ere, ironia aberasteko eta sinbologia ugariko literatura munduan murgildu da. Apoaren edertasuna, Quebec eta Agur Intxorta maite lanetan Tapia abeslari eraginkor eta berezi gisa aurkezten zaigu estuki gorde nahi duen musika-ideologiaren eramaile gisa.
Tapiak ez du bere talentua eskaintzaile onenaren esku uzten, bere apostuen arduradun bakarra da, baita Ñaco Goñirekin batera bluesaren bideetan barrena egiten duen erantzule bakarra.