BATZUK : H0TSAK DANTZAN
GAZTELUPEKO HOTSAK - 2008/01
CD

Gaztelupeko Hotsak-ekoek ere groove, thecno, electronics, dub eta erremixen mundua bisitatu nahi izan dute oraingoan. Eta horretarako ideia ona izan dute: Jimmy Bidaurreta ekarri eta etxeko hamar kantu pasatzea, aukerako kantuei ikuspegi berria emateko; baldintza bakarra: leloen sustraia eta nortasuna errespetatu egin behar dira. Bidaurreta donostiarra teklatu jotzaile nabarmena dugu (Argor, Acid Gazz, Ortophonk, Javi P3z Orchestra) eta proposatutako erronka nota altu batez gainditu du. Kantu gehienak oso ezagunak dira eta estilo ezberdinetatik etorri arren (Tapia eta Leturia, UEK, Txuma Murugarren, Rafa Rueda, Morau, Bide Ertzean, Petti ...), bakoitzari bere tempoa aurkitu ondoren lelo gehienak erdi lehengusinak gertatzen dira. Hortxe daude aldaketak: bossa, latinoa, dance-a (Bide Ertzean), brasildar batucada (nori eta Morauri!), elektronikoa (Petti, hain fresko) eta ustekabe gehiago. Eta hau gutxi balitz bonus track pare bat, Euskal Herriko dantzalekuetan gozatzeko: Deabruak Teilatuetan-eko "Behin eta berriz" (The Cars eta Bloc Partyren artean) eta Maiderren "Itxarote horrek" balada, biak orain arte kaleratu gabeak.