“Hip Hop? Bai, ikusia daukat MTV katean. Beltz kankailuak, urrezko kateak lepoan eta neskak inguruan…”

Aurreiritzi asko dago azken bi hamarkadetan izan den mugimendu interesgarrienetakoa denaren inguruan. Musika mezua bezain oldarkorra eginez, irudia eta logistika azkeneraino zainduz, Etsai Publikoak beltz alferra astindu zuen: zuriak nazio beltzari egindako kaltea salatzea zilegi da baina ez nahikoa, elkartasuna eta ezagutza dira bideak. Demagogia? Seguru asko. Estilo iraultza? Ukaezina. Public Enemy azaldu zirenerako mugimendua hasia zen, baina beraiek suspertu zuten inork baino indartsuago.